أخبارصحة

تدوينة مرعبة من طبيب بمستشفى شارل نيكول

أنا وجيه ذكار، طبيب داخلي في في قسم الاستعجالي، نشتغل وحدي في غياب تام لاي ممرض معايا في قسم (box médecine) وين حالات العباد المستعجلة تنجم تموت اذا مايتمش الكشف عليها في اقل من 10 دقايق (حسب التوصيات العلمية اكيد).

غياب الممرض متاع حصة الليل استمر اكثر من ساعة وانا نسال عليه ونعاود بينما انا من 14h وانا نخدم دون انقطاع وحتى الفطور ماخلطتش عليه خاتر عدد المرضى فوق العادي، اكثر من 200 في الليلة الواحدة.

كيف طوالت فترة غياب الشخص اللي لازمو يكون موجود مشيت نسال في المسؤول غادي ونفسرلو اللي هكا مش ممكنة الخدمة ورانا متڨطعين والي مرضى تجي ب douleur thoracique ولازم يصيرلهم تخطيط عالبلاصة،يجاوبني ويقول “الفراملة متقلقين ومايحب حد يجي يخدم لهنا”

واللي يتفهم من هنا اللي هوما متقلقين خاتر انا في وقت سابق نقدت التكركير متاع البعض منهم واهمالهم للمرضى وتقصيرهم في أداء واجبهم.. واللي تباركالله خلى شعب الشبه طبي يدور ويسبني من كل حدب وصوب عبر تعاليقهم وميساجات التهديد متاعهم ونعتهم ليا بالفاظ متاع جهوية وثلب بكل الاشكال دون انقطاع توة منذ اكثر من شهر.

وبالتالي الفراملة كيف تنقد تصرفات البعض منهم في مايتعلق بالتكركير يجاوبوك بكونهم يرفضوا يخدموا من اساسه ويكشفوا على المرضى ويعرضوا حياتهم للخطر بش يعاقبوني على طول لساني كيف تجرأت ونقدت السيستام متاعهم.

الحاصل انا اعلمت الطبيبة المسؤولة البارح واعلمت القيم العام اللي انا مش منجم نواصل العمل بالطريقة هاذي، قالولي تو ندّخلوا ونبعثو شكون يجي غادي لكن ماصار شيء وقعدت نشتغل ليلة كاملة وحدي، باستثناء انهم بعثوا طالب سنة اولى تمريض بش يجي هو يخدم كيف زاد عدد المرضى في اخر الليل ووصل فما حالة متاع اعتداء بالعنف اللفظي من قبل احد مرافقي المرضى كيف الرعاية الصحية اللي بش يتلقاها تاخرت بدرجة كبيرة.

و وفات الgarde وانا متاكد اللي فما شكون  تلقى علاج كيما ينبغي وفما اللي لا، وانا متاكد ايضا اللي كي انا توة قاعد نكتب في تقرير للتفقدية انه مش بش يتبدل شيء(خاتر في السبيطار فما شكون عندو في ذمته اكثر من 25 تقرير وماصارلو حتى شيء)

اما تبقى نكتب في السطور هاذم بش نهار اللي يجي شكون يسال ويقول علاه حال السبيطار هكا؟ وعلاش ماتتكلموش بش تتحسن الخدمة والرعاية الصحية للمريض؟ يعرف جزء من الاجابة واللي هي كي تمسّ السيستام متاعهم يضربك الضو انت والمرضى اللي في ذمتك زادة.

لذا تفضّل تسكر فمك وتخدم انت اكثر من 36 ساعة عمل متواصلة بش تنجم تعاون المرضى، خير مايجيك شكون يقلك “انت ماهو تسبّ في الفراملة!! مالا هانا تو نعطّلولك الخدمة(واللي هي حياة المرضى بالمناسبة) “.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى