لمين النهدي:”سعاد محاسن كانت ما تتلفتليش بالكل كنت نكرة بالنسبة ليها..اول لحظة حكيت معاها هي جات داخلة للركح و انا شديتها و قبلتها..”(فيديو)

تحدث الكوميدي لمين النهدي في حلقة ليلة الخميس 05 أكتوبر 2023 من برنامج Jdt عن حياتها الخاصة و علاقته بالفنانة سعاد محاسن.

و قال النهدي:”كيف تعرفت على سعاد محاسن و جيت لتونس سكنت في السطح انا و سعاد الفنانة القديرة في البساج بحذا نسيبي و بحذا اخت سعاد .. سكنت في السطح على خاطر الظروف كانت على قدها و صعيبة جدا و حتى الشهرسة لتو ما عنديش وقتها دوب ما هبطت من الكاف أنا و سعاد مازلت ما دخلتش لفرقة مدينة تونس وقتها سكنا في السطح و حتى جراية ندخلوها لبيت الصابون و نغفسوها باش نجموا نرتاحوا فيها … سعاد محاسن بدلت فيا برشا حاجات الفضل الكل يرجع ليها… سعاد انا نسميها المناضلة الى جانب لمين النهدي يعني هي الي دخلتني لفرقة مدينة تونس و ساهمت بنسبة نجاح متاعي قرابة 70% و عندي موهبة في التمثيل كيف نطلع على الركح علاقتي تولي مع المتفرج و حتى واحد ما يعمل عليك مزية … سعاد محاسن تعرفت عليها ضمن فرقة الكاف و كنت مخبوط فيها معناها ندهدس في حبها و تلفتني برشا من الأول كانت ما تتلفتليش بالكل نكرة بالنسبة ليها .. نتذكر اول لحظة حكيت معاها و ديما نحكيها و هي زادة ديما تحكيها و تعاودها و قعدت ذكرى من احلى ما يكون .. اول contact ما بيني انا و سعاد في قفصة … هي داخلة للركح بالمكياج متاعها في مسرحية حوكي و حرايري هي وقتها تعمل في دور المرأة و الرجل اك الدزيري و التونسية … هي جات داخلة للركح و انا شديتها و قبلتها قبل ما تدخل معناها أول قبلة صارت في المسرح و دخلت للركح و هي مهمشة … ما نتصورش يجي نهار نطلقها و الا نبعد عليها و الله اعلم لأنو بيناتنا حب كبير ما تتصوروش انا و سعاد محاسن قداش نحبو بعضنا حب كبير و لكن فما حاجة هامة جدا و لي هي عمري و لا قلقتها في خدمتها و عمرها و لا قلقتني في خدمتي .. احسن غناية تعجبني كيف تغنيها سعاد هي ” نادولي خالي ما نموتش اا ” كيف تغنيها و انا نبدى حاضر تبدى تغني فيها و تغزرلي”