ليلى طوبال: ايه اش عملنا في حكاية الفيزا لفرنسا؟؟

كتبت: الفنانة ليلى طوبال

على سلامتكم
سي رؤوف بن عمر فنان كبير نحبّو ونقدّرو برشه، تحلّت مشكلة الفيزا متاعو Tant mieux، إي والاخرين؟؟ الاخرين الكل الي ما همش فنانين وما همش معروفين وما يسمع بيهم حد وما يدافع عليهم حد وما يتضامن معاهم حدّ وإلّي لا عندهم لا والي لا تالي…

الام الي حضٌرت الزرير وماشية تفرح بأول حفيدة وما خذاتش الفيزا، البو الي بنتو راقدة في سبيطار ‘متشوشط’ هوني وما خذاش الفيزا، الوالدين الي قرٌاو وكبٌروا وباعوا طبٌة الارض باش ولدهم يقرى في الخارج ويولي حاجة كبيرة، حبوا يمشيو يحضروا في ال soutenance متاع الدكتوراه ، بالامارة البو شرى صباط جديد والام زغرطت حتى بحّ صوتها، وهبطوا يتڤرڤبوا في لواج وشدّوا الصفّ سوايع ودفعوا السوراد وما خذاوش الفيزا، والشاب الي ما زال كي حطّ ساقو في الفن وتحرم من مشاركة في مهرجان خاطر ما خذاش الفيزا …

اولادنا وبناتنا الطلبة الي ولّاو يعدٌيو اكثر من عام يستناو في récépissé والا Titre de séjour ، ويمشيو يشدوا الصف من عقابات الليالي قدام les préfectures ويستنّاو سوايع ويتبهذلوا نحكيو عليهم والا لا؟؟؟ والا اكاهو C’est bon المهم صارت مشكلة حُسْتوا فيها وتبقى على خير يا امي عيشاء.

وقتاش باش يتحل مشكل الفيزاوات؟؟؟
اليوم السياسة هي الي تحدد في كل شيء، والدفاع على بعض القضايا والمواقف ولاّت مجرّد نبضات بافلوفية.

إلي يبدى ساق في الخبز المقطوع وساق في الفيزا متاع فنان، ويد هوني وراس غادي ، وهوعقوبة ربّي ما يعرفش يشطح ولا هو بهلوان ولا فهيم، يسايس روحو ماللطخة.