بعد إعلان إنفصالها على زوجها بسبب الإنجاب : منال عبد القوي ترد على منتقديها.. “يا ربي قوّيني على مرضي و على مرض العباد”..
منال عبدالقوي ترد على الصحفية منى البوعزيزي حيث كتبت على صفحتها الرسمية بموقع التواصل الاجتماعي فايسبوك مايلي :يا ربي قوّيني على المرضى الي في هالدنيا!!! توة أنا فرحانة بعودتي وأعلنت مسرحيتي الجديدة مع نوفل، وزدت مازلت كيف نشرت خبر جديد لاختياري بطلة مسرحية تونسية ايطالية مشتركة تبحث في عمق التاريخ مع صديقي الفنان والدكتور ” الحبيب نمري” ، في طمبك امي محتاجتني معناها وبش تعمل زوز عمليات ….
تجيني كابتور من نفس الصحفية الي هبطتنا أنا وجعفر ريش وفتاريش وبعد ما تعدات الحلقة كلات شلبوق مهني يرهوج، تقول شعففتشي؟؟؟ابدا مسيبة ربي و خدمتها ولاهية بيا ، تقطّع وتريّش في قرار يخصني وحدي أنا وزوجي السابق، الي نبّه عليا وقالي ماعادش تجبد الموضوع جملة في أي تصريح وأنا اصلا نحب نسكره الموضوع، الأخت الصحفية مكبشة وتعلّم فيا فوائد التبني
يا انسة: الرسول صلى الله عليه وسلم قال انو هو وكافل اليتيم في نفس المنزلة في الجنّة و التبنّي من انبل وأرقى الافعال في الحياة، أما هذا قراري أنا وحياتي أنا ، نبيل من شهامته ونبله ورقيّه وافق عالتبني الي حتى أنا خممت فيه لكن أنا ماحبيتش يضحّي على خاطري لأنه أحنا اذا كل واحد يعاود حياته ينجم يجيب اولاد ومن حق كل انسان مادام عنده أمل يجيب من صلبه انو يحاول .
واذا ربي ما حبش يلجأ للتبني أو كفل يتيم، أنا وياه قررنا هكاكة و أنا اقنعته يعاود حياته وللبيوت اسرارها، أنا ما كنتش نحب نحكي جملة على حياتي الخاصة في الاعلام لكن نوفل نحبو مانجمش مانجاوبش وزيد وضحت للناس الي خايفين عليا وماشي في بالهم أنا في مرحلة خطيرة بمرض خبيث ، فسرتلهم وقلت نسكر الموضوع فرد مرة وننتقل للخدمة،الصحفية المحترفة جدا ما ركزتش على عودتي الفنية بزوز اعمال مختلفة ومهمة بل كبشت في حياتي الخاصّة!!
يااخت ايجي عيشي معايا وقرري حياتي في بلاصتي!!
والله اخيب حاجة للفنان انو يقعد يحكي ويفسر وخاصة حياته الخاصة أنا مش مالنوع الي نحقر الناس الي تحبني وتحب تنصحني وتعطي رايها في قراراتي حتى ولو خاصة خاطر نعرفهم يحبّوني هذاكعلاش هذا اخر صطاطو نكتبو على حياتي الخاصة ، أما الانسة الصحفية نتمنالك ربي يجيبلك اخبار مهنية هامة أو حاجة خاصّة جدا تتلهي فيها
وشكرننننن
أهم حاجة راني عندي زوز اعمال راجعة بيهم دعواتكم والاهم امي تقوم لاباس دعواتكم . نحبكم.،
