زكرياء بوقرة يتضامن مع ريم الرياحي :”هتكولها عرضها وهي ساكتة.. لآخر دقيقة قوية وشامخة”

أطلق تونسيون عبر صفحات مواقع التواصل الاجتماعي حملة دعم ومساندة للممثلة ريم الرياحي، وذلك بعد ظهورها في برنامج فكرة سامي الفهري وحديثها عن خلافها الأخير مع زوجها وتعرضها للظلم والتشويه.
ومن بين المساندين لها، الدكتور زكرياء بوقرة الذي نشر تدوينة مطولة على حسابه الخاص يعبّر فيها عن تضامنه معها ويهاجم المجتمع التونسي، وهذا ما نشره :”
عنا برشة مشاكل في تونس
أما ممكن أخطرهم هي قلة التربية ونكران الجميل
قبل ما تصيرلها المشكلة كان فما شبه إجماع على ريم الرياحي في المجتمع التونسي
مش من عدم
خاطرها ذكية, خاطرها متربية, خاطرها جميلة, خاطرها رزينة, خاطرها حساسة .
من الاخر خاطرها فنانة حقيقية خلطت مستنا الكل ونتشرفو بيها قدام العالم
هذا كان قبل أوت 2022
خاطر كي طاحت في بقعة ما تلقى جمهورها والعباد إلي دخلتلهم الفرحة لديارهم معاها
نفس العباد هذوكم تلذذو من مصائبها
خرجوا الخيوبية والشر إلي فيهم
كل نهار ينهشولها في لحمها وهي ساكتة
كل نهار يسلخو فيها بتظوميرهم ومصاطتهم وهي ساكتة
آلاف التدوينات خرجوهم واتهموها بأبشع النعوت
وهذا الكل وهي ساكتة
البارح خرجت وحكات والغصة في قلبها
حكات على الوجيعة متاعها
حكات على الظلم والخيانة
حكات على التضحيات إلي تجبرت عليهم
لإخر دقيقة قعدت قوية وشامخة
لإخر دقيقة ما خلاتش كارهيها يفرحوا بدمعتها العزيزة
ما نفهمش منين جابت القوة
البارح ريم بش تفسر علاش رصاتلها تتخلى على الحضانة متع صغارها قالت “أنا مرا تمسخت وما عادش نجم نوصل صغاري للمكتب”
لا ريم مش إنت إلي تمسخت!!
إلي تمسخ هو هذا المجتمع المنافق الكذاب الخائن المغيار والجبان
وقتاش بش نتعلمو نتلهاو في حوايجنا ؟
وقتاش نتعلمو نسيبو حياة وأعراض الناس؟
وقتاش نتعلمو نيزيو من كلامنا المرزي إلي يوجع ويحطم العباد؟
عيب عليكم
عيب كبير
نشالله نهار تتعلمو وتوصلو لظفر الشرف متع ريم الرياحي”.