المنتج جمال العدل يهاجم سارة التونسي والأخيرة تكذّبه: عيب على سنّك وتاريخك..عندي كلام خطير عنه بس مش فاضية له
انفعلت الفنانة التونسية سارة التونسي على المنتج جمال العدل، بعد تصريحاته الأخيرة ضدها ببرنامج “حبر سري”، وحديثه حول أسباب استبعادها من مشاركة النجمة يسرا بطولة مسلسل “حرب أهلية”، واستبدال الفنانة أروى جودة، كما أنه في معظم اللقاء أقسم أنه لا يتذكر اسمها، وأنها غير ملتزمة بالمواعيد.
وقالت سارة التونسي، في منشور طويل كتبته عبر حسابه الشخصي على “فيسبوك”، ترد فيه على تصريحاته وكذّبته في كل ما قاله، وكتبت: “أستاذ جمال العدل، أنا مكنتش عارفة إني مضايقة حضرتك أوي كدة خصوصاً بعد ما أنا كسبت القضية ضد شركة العدل جروب وحضرتك خسرت قضيتك ضدي”.
وتابعت: “بس ياااااه انت لسه فاكر؟ ده عدى على الموضوع ده أكتر من سنتين وأنا والله نسيت الموضوع (بس دي “والله” بجد مش زي بتاعتك) واشتغلت في بلدي و كسّرت الدنيا ولو عايزة أشتغل في مصر هشتغل، أصل مصر دي كبيرة أوي يعني أكبر من حضرتك ومن أي حد، ولا ايه يا أستاذ جمال؟ مش انت إسمك كده برضه؟ والله عيب على سنّك و تاريخك كمية الكذب اللي انت كاذبها بخصوصي في اللقاء ده (بس مش تاريخك كله يعني).
وأضافت: “وكمان حركة إنك نسيت الإسم دي تقلّل منك مش مني، بلاش أقولك شكلك كان عامل ازاي وانت بتحلف إنك نسيت الإسم، عملتها قبل كدة في إعلام بلدي تونس و اترد عليك رد عظيم من المذيعة التونسية اللي كانت بتحاور حضرتك”.
أما عن تصريحاته بأن سارة الآن تعيش خارج مصر، ردت سارة التونسي: “على فكرة أنا مطلعتش برة مصر! أنا عندي بيت في مصر بزوره كل شهر تقريباً وبختار أشتغل ايه ومشتغلش ايه وأنا اخترت أركز في تونس وعملت بطولة مسلسل تونسي كسّر الدنيا السنة اللي فاتت والإعلام العربي كلّه اتكلّم عنه و يمكن عشان كدة حضرتك افتكرتني تاني فجأة (ده لو كنت أصلا عرفت تنسى الدّرس) وإن شاء الله هيكسّر الدنيا في الجزء التاني السنة دي”.
وأكملت: “أنا أكبر من إني أشتغل أي عمل و خلاص عشان بس أقول أنا موجودة، و ده من زمان و انت عارف ده كويس واتكلمنا فيه لمّا حضرتك طلبت تقابلني في مكتبك عشان كنت عايز تمضي معايا عقد بـ٣ سنين بعد ما نجحت في دور شيرين في مسلسل “بـ١٠٠ وش” بأمارة ما قلتلي “أنا محتاج روح جديدة و دم جديد عشان اليل عندي في الشركة كبروا خلاص”، وقلت كلام تاني كتير عنهم في غيابهم.. ولا نسيت دي كمان؟، يومها أنا قلت لنفسي اللي يتكلم كدة عن ناس اشتغلوا معاه سنين، يخوّف، و رفضت أمضي مع حضرتك العقد ده يا أستاذ ياللي ناسي إسمي”.
وأردفت سارة التونسي: “أنا عندي كلام كتير و خطير ممكن أقوله بخصوص حضرتك، بخصوص اللي انت قلته في برنامج “حبر سري”، بس للأسف عندي تصوير و مش فاضية، و كمان حزني على اللي بيحصل في العالم مخليني مستتفهة كل الحاجات دي”.
وفي النهاية وجهت شكراً لجمهورها، قائلة: “شكراً لكل متابعيني اللي بعتولي الفيديو، أصلي أكيد مش متابعة ومفيش سبب يخليني أتابع حلقة بتستضيف شخص أنا أعرف عنه كتير بس اخترت أسكت ومطلعش في الإعلام وأخلي القضاء يقول كلمته وقالها الحمد لله”.
ووجهت في الختام رسالة لجمال العدل، قائلة: “حضرتك ولا اتعظت من عقاب ربنا وقتها بإن كل استديوهات و مخازن العدل جروب اتحرقت ولا اتعظت من إنك خسرت القضية وأنا الي كسبت الحمد لله ولا اتعظت من اللي بيحصل الأيام دي .. مش عارفه أقولك ايه والله وبصراحة ولا عندي وقت أقول أصلً، كفاية عليك المشاكل اللي حضرتك عاملها مع نص ممثلين مصر”.
