الدكتور زكرياء بوقرة: اليوم شاهدت شعب بطل ..محلاها تونس الجديدة

في تعليق له على اليوم الوطني الثاني للتلقيح والذي خصص للفئة العمرية بين 19 و39 سنة، قال الطبيب زكرياء بوقرة انه لن ينسى هذا اليوم لانه شاهد شعب بطل وشاهد جيل جديد طموح ورافض للرداءة.

وفيما يلي نص التدوينة:

نهار ليوم ما ننساهش
ليوم في مركز التلقيح بطبربة شفت شعب واعي بطل كل شيء بش يجي يلقح
لا صارت عركة لا صارت نبزة لا صارت نطرة
العباد الكل متفهمة
العباد الكل صابرة
العباد الكل الضحكة ما تنحاتش من وجهم
شفت أمن وجيش يشرفونا في العالم
الكلهم منظبطين من الصباح للليل وهوما واقفين
ومع هذا الكلهم سيسين يجاوبو يعاونو وين تدور تلقاهم مع مواطن ينعتو فيه شنوة لازم يعمل
شفت مجتمع مدني وقفلي مخي
صغار ناشطين فايقين يطمنوك على مستقبل بلادنا
جيل جديد تماما كي يحكيولك على شنوة يعملو من مساعدات للبشر للحيوانات ولا الطبيعة تحشم على روحك
جيل طموح وما عادش بش يقبل بالردائة متع الدولة الي بناوها الي قبلنا
و شفت زادا طبة ممرضين صيادلة واطارات صحة مازالو لتوة متجندين
بالرغم من التعب متع العامين هذوما
بالرغم من قلة المعروف متع الدولة
بالرغم من الايامات الصعيبة الي عيشوهملنا
مازالو مواصلين
مازالو مأمنين اننا بش نغلبوها
لتوة عاطين كل ما عندهم بش يحاربو ها الكابوس الي غرقونا فيه
اكيد النهار هذا موش بش ننساه
شكرا من كل قلبي للعباد الي نجحتو ومبروك لتونس الرقم القياسي الجديد