إلهام شاهين: الرقابة تقبل أعمال تافهة وترفض أعمالي الهادفة و الممتعة (فيديو)

حلت الفنانة إلهام شاهين ضيفة ببرنامج “كل يوم” على قناة ON E، وتحدثت عن الفن الحالي وتحديداً دور الرقابة، التي أكدت أنها توافق على أعمال وصفتها بالتافهة، بينما رفضت أعمال فنية هادفة وممتعة.

قالت إلهام شاهين في لقائها: “المفروض يكون عندنا رقابة على نفسنا واحنا مش هنعمل حاجة لا ضد الفن ولا ضد بلدنا”.

وأبدت اعتراضها على الرقابة، قائلة:”أنا معترضة على الرقابة أنها بتدي موافقة لأفلام تافهة جداً المفروض يرفض ويقول دون المستوى لأن المفروض أنك بترتقي بذوق الناس والأعمال الفنية المفروض يبقى لها قيمة وممتعة”.

وأضافت: “الفن لازم يؤثر في مشاعر وأفكار الناس ومينفعش يكون في محرمات ولازم يكون في ثقة وانا عندي خبرة وعندي رقابة داخلية ومينفعش يكون في أوصياء على المجتمع يقولوا يشوفوا ايه وميشوفوش ايه لانهم لو مشافهوش عندك هيشوفوه على المنصات وفي شباب صغير قالولي احنا بناقش على السوشيال ميديا المواضيع اللي انتم مش قادرين تناقشوها في السينما”.

وعن رفض أعمالها قالت إلهام شاهين: “مشكلة الرقابة في الناس اللي بتقرأ وبتقرر مصيرنا وطبعا في بعض المواضيع الهامة بتتعرض على جهات أخرى، أنا لما فتحت شركة إنتاج اشتريت موضوعات هامة جدا لأن أنا عايزة لما انتج اعمل حاجة كبيرة ومهمة ومش مهم الإيرادات وفي مواضيع كنت اشتريتها كانت محتاجة تجديد تصريح الرقابة وده كان بيحصل بشكل تلقائي لكن تفاجأت أن في موضوع اترفض ومن غير أسباب وانا كنت اشتريته ودفعت فلوس الاخراج والانتاج وشراء السيناريو ونفس الكلام حصل مع موضوع كانت هالة خليل كاتباه والرفض بيكون بدون أسباب”