محرز الغنوشي:“الّي في بالو الدنيا سخنت مزال ما را شي..ودرجات الحرارة تتجاوز ال40 درجة في قادم الأيام ”

نشر المهندس بالرصد الجوي محرز الغنوشي :”مساء الخير وان شاء الله تكونوا استمتعتو بنهاية الأسبوع..اللي في بالو بالدنيا سخنت شوية سبت واحد نقلو حكاية فارغة ومازلت ما ريت شيء..في الخرائط الموالية توقعات النموذج الاوروبي لحرارة الأربعاء والخميس الجايين ومن غير بارشا تعقيدات وكيف ما تشوفوا انو ألوان الشمال هي بيدها ألوان الجنوب وكيف كيف الوسط زادة .. فبحيث من المنتظر تجاوز 39 او 40 درجة في العديد من الولايات مع ظهور الشهيلي..

ارقام ما تبعدش بارشا على المعدلات العادية بالجنوب انما الفارق بالنسبة للمستويات المرجعية في الشمال قد يتجاوز 5 درجات ولكن تبقى قيم بعيدة زادة على الأرقام القياسية..
الهدف من التدوينة انو نقراو في حسابنا الارتفاع هذا وما يفاجأناش لا غير وفي الاخر السخانة متسمية عالصيف..ربي يلطف بينا ويعطينا قد جهودنا وربي يحفظكم زادة..ملاحظة : التدوينة هذي لاصحابي واحبابي.. ماغير ما تعملولي فيها شكاية زادة.. راني قريب نعمل carte fidélité في المراكز والمحكمة 🤣🤣 ..كورديالمون..”